Madiwani Rukwa watakiwa kusimamia mapato na miradi ya maendeleo ya halmashauri zao

Ilibandikwa: May 15th, 2017

Madiwani mkoani Rukwa wametakiwa kutumia nafasi zao kisiasa kwa kuwaadhibu Watendaji wa halmashauri zao ambao wamekuwa wakishiriki katika vitendo vya kuhujumu mapato ya halmashauri hizo.

Ushauri huo umetolewa na Mkuu wa mkoa wa Rukwa Zelote Stephene Zelote wakati akifungua mafunzo ya siku mbili ya Uimarishaji wa Mifumo ya Sekta ya Umma  katika mradi wa P3 yakifadhiliwa na serikali ya Amerika  yanayofanyika mjini Sumbawanga mkoani Rukwa.

Zelote alisema ukusanyaji wa mapato ya halmashauri na utekelezaji wa miradi ya maendeleo imekuwa ya kusuasua kutokana na uzembe na ubadhirifu wa baadhi ya watendaji wa serikali ambao wamekuwa wakifanya vitendo viovu vya ufujaji kwa manufaa yao binafsi.

Aidha Mkuu huyo wa mkoa aliwatahadharisha Madiwani wa halmashauri zote za mkoa wa Rukwa kutotumia nafasi zao za kisiasa kwaajili ya kupata zabuni katika halmashauri zao kwani kufanya hivyo kutochochea utendaji mbovu wa halmashauri zao.

Aliwataka kuhakikisha wanasimamia huduma bora kwa wananchi wao hadi ngazi za chini lakini pia wakiwapa nafasi wananchi kuzungumza kero zao zinawakabili na zitatuliwe kwa haraka.