MABARAZA YA WAFANYAKAZI YAWE TASWIRA YA UTENDAJI KWA HALMASHAURI RUKWA

Ilibandikwa: January 3rd, 2024

Kitengo cha Mawasiliano

Wakurugenzi wa Halmashauri mkoani Rukwa wametakiwa kuyapa fursa  Mabaraza ya Wafanyakazi kwenye halmashauri zao  kuweza kujadiliana changamoto zinazowakabili ili waweze kuzitatua changamoto zao sehemu za kazi kwa lengo la kuongeza uwajibikaji na tija katika utumishi.

Rai hiyo imetolewa na Kaimu Katibu Tawala wa mkoa wa Rukwa Donald Nssoko wakati uzinduzi wa Baraza la Wafanyakazi la Halmashauri ya Manispaa ya Sumbawanga ambapo Watumishi hao walipata fursa ya kueleza  na kupewa ufafanuzi wa changamoto mbalimbali zinazowakabili.

Nssoko alisema kuwa utendaji kazi wa Mabaraza ya Wafanyakazi kwenye halmashauri ni sawa ni kioo ambacho Wakurugenzi wanaweza kukitumia kuona taswira ya ufanisi wa halmashauri zao na kutumia nafasi hiyo kurekebisha dosari zilizopo ili kazi ziweze kufanyika huku Watumishi waweze kufanyakazi kwa kujituma na ari pia.

Kwa upande wake Kaimu Mkurugenzi wa Halmashauri ya Manispaa Sumbawanga Kulanga Kayanga alisema maelekezo yaliyotolewa na serikali ya mkoa yamepokelewa na kila Mtumishi hivyo kilichobaki ni suala uwajibikaji katika maeneo ya kazi kwa kila mtu kutimiza wajibu wake ili kupata haki za kiutumishi lakini pia kuwatumikia wananchi.

Katibu Msaidizi wa Baraza la Wafanyakazi la Halmashauri ya Manispaa ya Sumbawanga Edina Mbise ambaye ni mmoja kati ya viongozi walichaguliwa kwenye kikao hicho alisema wamechukua kijiti cha uongozi wakiwa na mikakati ya kusikiliza changamoto za Watumishi na kuziwasilisha kwa Mwajiri ili ziweze kutatua kwa kufuata ngazi husika.

Saada Kimanta aliyehudhuria kikao hicho akiwa ni Mtendaji wa kata ya Mzwi alisema awali walikuwa na changamoto nyingi zikiwapo za malimbikizo ya mishahara na malipo fedha za likizo lakini kupitia kikao hicho Kaimu Mkurugenzi Kayanga amezitolea ufafanuzi na ahadi ya kuzishughulikia, hivyo wana imani kuwa matatizo yao yatakwisha baada ya kuwasilishwa serikalini.