MKURUGENZI MTALITINYA AZITAKA IDARA NA VITENGO VYATAKIWA KUFANYA MAFUNZO YA NDANI

Ilibandikwa: May 27th, 2022

Na Khadija Dalasia,

Afisa Mawasiliano Serikalini,Manispaa ya Sumbawanga.

Mkurugenzi  Manispaa ya Sumbawanga Jacob James  Mtalitinya  amewataka  wakuu wa idara  zote katika Halmashauri ya Manispaa ya Sumbawanga  kuhakikisha  wanaandaa mafunzo ya ndani na kuwajengea uwezo watumishi wao ili waweze kutekeleza majukumu yao ipasavyo katika idara zao.

Ameyasema hayo jana wakati wa ufunguzi wa mafunzo wa Maafisa Ugani wa Kilimo na Mifugo mafunzo yaliyoandaliwa na Idara ya Kilimo, Mifugo na Uvuvi kupitia fedha za ruzuku na mapato mengineyo “OC” ya idara hiyo.

Katika mafunzo  hayo Mtalitinya alimpongeza Kaimu Mkuu idara hiyo Eliud Fungo kwa  ubunifu huo alioufanya ambapo ameweza kutumia fedha  hizo za ruzuku kuandaa mafunzo hayo ambayo yanatoa motisha chanya kwa watumishi na pia kuimarisha umoja na ushirikiano katika idara yao.

Alisema.. “Mkurugenzi hawezi kuwa Mkurungezi kama Idara na Vitengo vyake havifanyi kazi zao na kutimiza wajibu wao. Iwapo Idara na Vitengo vitafanya kazi na kutimiza wajibu wao, zikiwajengea uwezo watumishi wao,zikifanya kwa weledi majukumu yao   na kufanya kwa ushirikiano, umoja na upendo taasisi ikaenda hapo ndipo Mkurugenzi anakuwa Mkurugenzi . Kinyume na hapo Mkurugenzi anageuka kuwa kiranja kwenda kutekeleza Majukumu ya Wakuu wa Idara na vitengo katika idara zao ili mambo yaende kwenye taasisi”

Hatahivyo MkurugenziMtalitinya aliwataka watumishi wote katika halmashauri hiyo kutekeleza kwa vitendo na kuonesha ni namna gani fani walizosomea zinawasaidia katika maisha yao ya kila siku na si kusubiri hadi wakati wa kustaafu ndio waanze kufanya shughuli zitakazo waingizia kipato kupitia fani zao.

Aidha aliiagiza  Idara ya Kilimo, Mifugo na Uvuvi kuhakikisha wanaweka utaratibu mzuri  ambao utafanikisha maafisa ugani  kushiriki maonesho ya Nane nane yatakayofanyika Jijini Mbeya katika viwanja vya Mwakangale baadaye mwaka huu.